استمع قصيده الكارثه ..رثاء في المغفور زايد

http://www.9adauae.com/karetht_elqarn.ram


الله يرحمك يابويه زايد



---- كارثة هالقرن ----

كارثة هالقرن صدمة هزت القلب الجمود من صداها رج منه فالمشارق والمغارب

والجنازة لي مشت من دوم موكب او ورود وردها دمع العيون وحزنها اكبر مواكب

حل في ليلة غيابك بالامارات الركود والشوارع والمداين مابها غير الهبايب

والعلم حشمه لزايد كبر وصلى سجود وانتكس معلن حداده .. قال للمغفور واجب

من مخافة ربنا خفنا نتشبه باليهود ولا مزعنا الثياب لفقد زايد كالاجانب

والبكا قالوا يزيد الميت يعذبه زود واحنا ندري من بكانا يعذبك ير النحاير

فلو نهى الاسلام اهله عن بكي الميت ياكود مانهت بعض الديانات اهلها كف الهدايب

فالحديث عن النبي صحيح من معنى الورود قال ان الله لو قد حب عبدا من حبايب

نادى ياجبيرل قد احببت عبدا بالوجود فأحبب العبد الذي احببته فوق الرحايب

فينادي جبريل السماء ومن عليها بلا فنود حبو حبيب الله يامن فالسماء فوق السحايب

فيحبه اهل السماء ومن عليها بلا حدود فيلاقي فالارض القبول ويهتني بالعيش طايب

وزايدا لا ماتلاقي له عدو ولا لدود ومن محبته وغلاته نبكي اكبر المصايب

ونحن حاولنا انتصبر بس اصعبنا الصمود وعالفجيعة ماقدرنا نجاهد الدمع و نحارب

فالنبي وهو النبي شفاعنا يوم الوعود من فجيعة موتة ابنه دمعته طاحت سكايب

قال في معناه بان العين بالمدمع تجود والقلب محزون يبكي من فراق اغلى الاقارب

دام سيدنا محمد ماقوى دمعه يذود كيف ماندمع وتمشي من مدامعنا المراكب

كنت اظن الدمع حده مايجاوز هالخدود لين شفته شوف عيني منتثر في كل جانب

قلت هذا بس دمعي .. كيف لي خلف الحدود لو جمعنا دموعهم ودموع شعبك بالحسايب

كان طمينا البحار و كان هدينا السدود والخريطة كلها صارت مياه بلا هضايب

وكان كلفنا النصانع من بعد حث الجهود تصنع انبوب المياه اللي بو اربع مضارب

مضربا يروي البحار ولي بقى يرور سنود اسيا وأفريقيا والرابعة باقي الحبايب

لو يقاس الدمع حجمه عالفجيعة بالنقود كان عدى النفط سعره من كبر ذيك النوايب

ليتني جالس مكانه فالنعش وهو يعود لا تزال القدس منه ناوية طرد المحارب

وكم حكام وملوك عيالهم تعلن جحود و للجنازة يخصصون رجال تحملها برواتب

بس انجال الفلاحي قطعوا كل القيود يوم ساقوها الجنازة مملة فوق المناكب

مارضى بكره خليفة ينقل النعش الجنود قال ما للنعش غير عياله واقرب قرايب

هذا زايد لي حملنا فوق كتفه من المهود ولا سخينا فالجنازة يحمله بالاجر حاجب

واه .. حزن يعقوب كنه لقد يوسف بالنكود بان من محجر خليفة يوم دمع العين ناضب

غسلوه وكفنوه .. و لا كسوه افخر جلود لبسوه اغلى وشاحا تنخضع دونه رقايب

العلم ياللي قضى عمره على شانه يذود لجل ماتوصل بلاده في اوج اعلى مراتب

و عضة محمد على اسفل ثمه بكت حشود مايعبر عنها شاعر ولا هو اي كاتب

يوم صلوا عالجنازة بلا ركوع او سجود وعين بوخالد تناظر والده للقبر ذاهب

بس هذه سنة الله في عباده من حياه للحود والحياة نقطة عبور وكلنا فيها نطالب

وسنة الله في عباده من حياة للحود والحياة نقطه عبور وكلنا فيها نطالب

ونكرم الميت بدفنه لو بها فطر الكبود وكل مانسرع بدفنه يعتبر بالدين صايب

حافظ الله عالتعاون الخليجي فالشدود شاركوا دفن الجنازة مانسوا من كان صاحب

مرحبا بآل الصباح ولابة سعود آل ثاني وبوسعيد وابن عيسى والنجايب

مرحبا باللي حضر واللي تأخر من وفود خلف الحر الفلاحي مثلهم ياكم شارب

في طلايعهم خليفه ومن حواليه الاسود الرجال اللي استفادوا من أبوهم التجارب

الرجال اللي تحدوا هالعواذل والحسود واقطعوا كلام اللي سعابه كل كاذب

صفهم من عقب زايد مرتفع سهمه صعود ماتفرق شملهم منهم عدو الدار هايب

كيف قالوا مات زايد كيف ماهو بالوجود مايموت اللي وراه مخلف رجال وكتايب

وزايدا لازال اسمه في ضمايرنا يسود عايشا ولا زال باقي في حشانا والهدايب

والدليل ان حان ذكره . . تسمع الياهل وعود الله يطول بعمره ما كانع اليوم غايب

والامانه والشهاده واجبه ونحن شهود بيض الله وجه منه شورهم كان قد صايب

نائبك مكتوم ويا اخوانه السته عضود لي ف ثاني ليله ولوا خليفه ع المناصب

احتراما لك يازايد لانك الاب الودود ومن بُعد نظر فخليفه ان الشخص المناسب

ماعطوا الدستور يوم وهو ثلاثين معدود موقف يعكس تحلي دولتي بأحلى المذاهب

ليت يا زايد عيالك شفتهم ليتك تعود يوم بوسلطان شد حزامه وساق الركايب

وقفوا وبا خليفه وحملهم فوق الزنود وين مايامر خليفه رضوا كل الصعايب

والشعب بايع رئيسه بالحلايف والعهود ومن تهاون دون داره مات بين الناس عايب

ويا خليفه سر ونحنا شعبك المخلص جنود مانحاتي دون شفك لوتواجهنا المتاعب

رحت عنا ف الصيام ولا هنى للعيد نود كيف بنعايد بعضنا بالعزا ولا الرحايب

كيف ثوب العيد والله نلبسه ونحط عود والحزن ثوبه علينا مفصلا والوجه شاحب

مابقى فاليد حيله حل في جسمي برود ولا بقى غير الدعى باسم الذي عبده يحاسب

ياعسى الفردوس فالك وين جنات السعود دعوة العشر الأواخر يا عسى فالك تواكب

قالها العالم بكبره فالدعاء بعد الهجود والسديس اختم بها وسط الحرم تشييع غايب

كلمات الشاعر محمد بخيت المنهالي

صح لسانه الشاعــر .. والله يرحم ابونا .. ويسكنه الفردوس الاعلى بأذن الله

مشكوره اختي ع الطرح الجميل والرائع

تقبلي مرووووري

يعطيش ألف عافية على الموضوع

تسلمووووووون ع المرور

سلمت يدااااااااااااااااااااااااااااااااكي

ثااااااااانكس